4-5 ოქტომბერს ბათუმის ხელოვნების უნივერსიტეტის მუსიკის ფაკულტეტის სტუდენტებისთვის საჯარო ლექცია და მასტერ-კლასი ჩაატარა თბილისის ვ.სარაჯიშვილის სახელობის სახელმწიფო კონსერვატორიის ასოცირებულმა პროფესორმა, მუსიკოლოგიის დოქტორმა ნინო ჟვანიამ. ლექცია მიეძღვნა თანამედროვე საფორტეპიანო საშემსრულებლო ხელოვნების პრობლემებს.

ხელოვნების უნივერსიტეტის რექტორს 1999-2004 წლებში, პროფესორ გიზო ჟორდანიას დაბადებიდან 80 წელი შეუსრულდა. ღვაწლმოსილ პედაგოგს სტუდენტებმა და პროფესორ-მასწავლებლებმა გულთბილი შეხვედრა მოუწყვეს სასცენო ხელოვნების დეპარტამენტში. უნივერსიტეტის რექტორატის გადაწყვეტილებით გიზო ჟორდანია დაჯილდოვდა საპატიო სიგელითა და გადაეცა სამახსოვრო საჩუქარი. სტუდენტებთან შეხვედრისას ხელოვანმა ბათუმთან დაკავშირებულ წლებსა და მოღვაწეობაზე ისაუბრა. ამჟამად გიზო ჟორდანია საოპერო სპექტაკლ "კარმენზე" მუშაობს, რომლის პრემიერა ბათუმის ხელოვნების ცენტრში 1 ნოემბერს გაიმართება.ხელოვნების უნივერსიტეტი ულოცავს ღვაწლმოსილ პედაგოგს საიუბილეო თარიღს და უსურვებს ხანგრძლივ სიცოცხლეს, ჯანმრთელობასა და შემოქმედებით წარმატებებს.

2 ოქტომბერს ბათუმის თანამედროვე ხელოვნების ცენტრში CAC 41N/41E გაიხსნა გამოფენა „იგივე-იგივე“, რომელიც ამერიკელი ხელოვანის რობერტ სმიტსონის „არა-ადგილის“ თეორიას ეფუძნება. გამოფენის ფარგლებში ხელოვნების უნივერსიტეტის სტუდენტები იმყოფებოდნენ ანაკლიაში, სადაც ისინი გაეცნენ საგამოფენო პროექტის სტრატეგიას, რომლის რედი-მეიდი - ე.წ. ტეტრაპოდები ჯერ კიდევ აუშენებელი ქალაქ ლაზიკის სანაპირო ზოლის დაცვის და ზოგადად თავდაცვის თემის კონცეპტუალურ გააზრებას გამოხატავს.

ხელოვნების უნივერსიტეტის ემერიტუსის ბესო (ვახტანგ) ბესელიას დაბადების 70 წლისადმი მიძღვნილი საიუბილეო გამოფენა გაიმართა აჭარის ხელოვნების მუზეუმში. უნივერსიტეტის რექტორატის გადაწყვეტილებით ბ. ბესელია დაჯილდოვდა საპატიო სიგელითა და ფულადი პრემიით. ხელოვნების უნივერსიტეტი ულოცავს ღვაწლმოსილ პედაგოგს საიუბილეო თარიღს და უსურვებს ხანგრძლივ სიცოცხლეს, ჯანმრთელობასა და შემოქმედებით წარმატებებს.

ხელოვნების უნივერსიტეტის სტუდენტებისათვის ნინო ჩუტკერაშვილის მასტერკლასი გაიმართა, თემაზე- დოკუმენტური კინოს პროდიუსინგი. ნინო ჩუტკერაშვილი აჭარაში კინოხელოვნების განვითარების ხელშეწყობის პროგრამის ფარგლებში, მხატვრული მოკლემეტრაჟიანი და დოკუმენტური ფილმების კონკურსის გამარჯვებული პროექტის „სომალის ტყვეები“ პროდიუსერია. დოკუმენტური ფილმის "სომალის ტყვეები" გადაღებები აჭარის რეგიონში 17 სექტემბერს დაიწყო და 8 დღის განმავლობაში გრძელდებოდა.