ხელოვნების უნივერსიტეტის მუსიკის ფაკულტეტის სტუდენტებმა ხელოვანთა კლუბის ორგანიზებით კლასიკური მუსიკის კონცერტი გამართეს. ღონისძიება აჭარის სპორტისა და ახალგაზრდობის საქმეთა დეპარტამენტის მხარდაჭერით გაიმართა. კონცერტს ესწრებოდა თურქეთის გენერალური კონსული მეუღლესთან ერთად.

ხელოვნების უნივერსიტეტს ირანის გენერალური კონსული ეწვია. ახმად რეზა არჯაანი უნივერსიტეტის რექტორს შეხვდა. საუბარი შეეხო ირანის კულტურის დღეებს, რომელიც ბათუმში 17-18 დეკემბერს გაიმართება. ღონისძიების ფარგლებში, ხელოვნების უნივერსიტეტში ირანელი რეჟისორების კინოსეანსები მოეწყობა. გაცნობითი ხასიათის შეხვედრაზე მხარეებმა ხელოვნების სფეროში სამომავლო თანამშრომლობის გეგმებზეც ისაუბრეს. ირანის გენერალური კონსულის თქმით, სამომავლოდ ერთობლივი შემოქმედებითი პროექტები შეიძლება დაიგეგმოს.

ხელოვნების უნივერსიტეტის მუსიკის ფაკულტეტზე გაიმართა კლასიკური მუსიკის საღამო, რომელშიც უნივერსიტეტის მოწვეული სპეციალისტი, დოქტორი ნუნუ ჭელიძე, თბილისის ოპერისა და ბალეტის სახელმწიფო აკადემიური თეატრის სოლისტები სალომე ჯიქია და დიმიტრი ბოქოლიშვილი მონაწილეობდნენ.

„აჭარაში კინოხელოვნების განვითარების ხელშეწყობის“ პროგრამის ფარგლებში ბათუმელი რეჟისორის, ხელოვნების უნივერსიტეტის კურსდამთავრებულისა და ამავე უნივერსიტეტის კინო-ტელე ხელოვნების დეპარტამენტის პედაგოგის შოთა გუჯაბიძის მოკლემეტრაჟიანი ფილმის - „რატომ არ მოველ წვიმადა“ - გადაღებები მიმდინარეობს. ფილმის შემოქმედებითი ჯგუფი ძირითადად ადგილობრივი კინოხელოვანებით არის დაკომპლექტებული და გადაღებების პროცესში ბათუმის ხელოვნების სასწავლო უნივერსიტეტის სტუდენტები აქტიურად არიან ჩართული. აჭარაში კინოხელოვნების განვითარების ხელშეწყობის პროგრამას აჭარის ა.რ. განათლების კულტურისა და სპორტის სამინისტრო უკვე მეორე წელია ახორციელებს და მისი ძირითადი მიზანი რეგიონში კინოწარმოების და კინოგანათლების ხელშეწყობაა.

26-27 ნოემბერს სახვითი ხელოვნების დეპარტამენტის სტუდენტებთან ასისტენტ-პროფესორმა ბექა ბოლქვაძემ ჩაატარა მასტერკლასი - „ჩანახატი“ და გამოფენა -პრეზენტაცია „პორტრეტი“.