სახვითი, სასცენო და კინო-ტელე ხელოვნების ფაკულტეტზე ჩატარდა სადიპლომო ნაშრომების დაცვა. რეჟისურის სპეციალობის კურსდამამთავრებლებმა ა. ლომთათიძემ, ე. კუპრეიშვილმა, ა.ლეჟავამ და მონტაჟის რეჟისურის პროფესიული საგანმანათლებლო პროგრამის კურსდამამთავრებელმა ბ. პატარაიამ საკუთარი ნამუშევრები წარუდგინეს საგამოცდო კომისიას.

გაიმართა სახვითი, სასცენო და კინო-ტელე ხელოვნების ფაკულტეტის დრამისა და თოჯინების თეატრის სამსახიობო სპეციალობის მეოთხე კურსის სადიპლომო სპექტაკლი "ჩიმი", ჯგუფის ხელმძღვანელი, სრული პროფესორი თ. ბოლქვაძე. მონაწილეობდნენ: ჩიმი - მირზა სათმანიძე, დომბი - ლაშა აბულაძე, დიმბი - გურამ იმნაძე, მოქსი - ნუკრი ლამპარაძე, ფოქსი - გიორგი ვარშანიძე (დრამატული თეატრის რეჟისურის სპეციალობის მე-2 კურსის სტუდენტი). პედაგოგ-ასისტენტი - მანანა ხელაია.

მიმდინარე წლის 22-28 ივნისს თურქეთში, ქალაქ ჩეშმეში გაიმართა საერთაშორისო ტურნირი ჭადრაკში, სადაც მონაწილეობა მიიღო ხელოვნების უნივერსიტეტის, კინომცოდნეობის სპეციალობის პირველი კურსის სტუდენტმა მარიამ თევზაძემ და მესამე ადგილი მოიპოვა. აღსანიშნავია, რომ ტურნირში ქალთა შორის საქართველოდან მხოლოდ ორი მოჭადრაკე მონაწილეობდა. მეორე მონაწილემ პირველი ადგილი მოიპოვა.

გაიმართა მუსიკის ფაკულტეტის კლავიშებიან საკრავთა დეპარტამენტის მესამე კურსის სტუდენტის სოსო პაპიძის სოლო კონცერტი. პედაგოგი პროფესორი ირინა ხერჟი. შესრულდა ს. რახმანინოვის სონატა №2 b-moll და ფ.ლისტის სონატა h-moll. მოწვეულ სტუმრებს საშუალება ჰქონდათ ენახათ სოსო პაპიძის ფოტონამუშევრების გამოფენა.

26-27 ივნისს ხელოვნების უნივერსიტეტის რექტორი ე. მესხია საქმიანი ვიზიტით იმყოფებოდა სომხეთის რესპუბლიკაში. ე. მესხიამ მონაწილეობა მიიღო ერევანში გამართულ საერთაშორისო კონფერენციაში, სადაც განხილულ იქნა კულტურის მენეჯმენტის პრობლემები.
სომხეთში ვიზიტის პერიოდში რექტორი ეწვია ერევნის არქიტექტურისა და მშენებლობის უნივერსიტეტს. საქმიანი შეხვედრის შემდეგ რექტორებმა ხელი მოაწერეს უნივერსიტეტებს შორის ურთიერთთანამშრომლობის მემორანდუმს.